Kvamsøy IL er eit idrettslag bygt på dugnad, utan løna trenarar eller godtgjersle. I søknaden til berekraftsfondet understrekar dei kor viktig det er å halde anlegget i god stand, sjølv om aktiviteten er mindre enn før, spesielt for å ta vare på barn og unge i bygda.

Den nye robotklipparen vil gjere vedlikehaldet enklare og meir miljøvennleg, og bidra til at grasmatta held høg standard også i framtida.

I sommar fekk Gunnar Ristesund og Asbjørn Støylen i Kvamsøy IL overrekt gåvesjekken frå Henrik Rodt, berekraftstrainee i Tussa Kraft.

Tildelinga frå berekraftsfondet er i tråd med Tussa sitt mål om å støtte tiltak som fremjar miljøvennleg praksis og sosial berekraft i lokalsamfunna vi er ein del av.

Grasbana på Kvamsøya er viktig for barn og unge i bygda.

Mottakarar av Tussa berekraftsfond i 2025

I 2025 fekk desse laga og organisasjonane støtte gjennom Tussa berekraftsfond:

Brandal Velforening i Hareid:
Installere varmepumpe, oppgradering av elektrisk anlegg, lys og stikkontaktar for å gjere Pakkhuset tryggare og betre eigna til arrangement.
Fairtrade Volda og Ørsta:
Lokale aktivitetar i samband med nasjonal kampanjeveke (13.–19. oktober 2025) for å fremje rettferdig handel, med særlege aktivitetar for barn og unge.
Gjerdsvika IL i Sande:
Oppgradere sikringsskap og skifte ut gamle lyskjelder til LED i klubbhuset, for tryggleik, miljø og betre lys.
Kvamsøy IL i Sande kommune:
Gå frå fossil traktorklippar til elektrisk robotklippar for vedlikehald av fotballbanen, slik at barn og unge har ein møtestad for aktivitet.
UL Fram på Åheim i Vanylven:
Renovering av ungdomshuset frå 1926 med ny kledning, vindu og isolasjon. Dette sparar straum og bevarer eit av landets best bevarte ungdomshus.
Søstrene Mel i Hornindal i Volda:
Ny produksjon av utespelet Søstrene Mel og sjøormen. Familieframsyning som handlar om klima, miljø, kultur og identitet, der profesjonelle og frivillige samarbeider.