Tussaparken i Ørsta sentrum viser ulike former for fornybar energiproduksjon. I parken er det ein liten vindturbin som produserer vindkraft, eit solcelleanlegg som produserer solkraft, og eit skovlhjul frå Tussa kraftverk som illustrerer vasskraft.

Fornybar energi er meir miljøvennleg og berekraftig

Energien vi får frå vatn, vind og sol er døme på fornybar energi. Fornybar energi er meir miljøvennleg og berekraftig, fordi han er basert på ressursar som naturen sjølv fornyar, utan bruk av fossile brennstoff.

Fornybar energi er viktig fordi:

• Fornybar energi er nøkkelen til ei berekraftig utvikling og til å stoppe klimaendringane.
• Straumforbruket vårt aukar. Skal vi erstatte fossile energikjelder, i til dømes industrien og transportsektoren, vil straumforbruket vårt auke med 30-50 TWh i året. Byggjer vi ut tilsvarande mengder med fornybar energi, vil vi halvere klimagassutsleppa våre.

Vasskraft - den mest effektive energikjelda vi har

Noreg er det sjuande største vasskraftlandet i verda, og klart størst i Europa. Vi er heldige som får nesten all straumen vår frå vasskraft.

I eit normalt nedbørsår blir det produsert om lag 132 TWh vasskraft i Noreg. Det er litt meir enn det vi normalt brukar av elektrisitet på eit år.

Vasskraft er bra fordi:

• Ho er fornybar og varar evig.
• Ho er rein og har ingen eller svært låge klimagassutslepp etter utbygging.
• Ho er fleksibel. I store vasskraftverk kan vi lagre vatnet, og krafta kan vi produsere når kundane treng ho.
• Det er ein lokal ressurs. Kvart år går ein stor del av inntektene frå kraftprodusentane tilbake til kommunane som har vore med å bygd ut kraftverka, og til lokalsamfunna der kraftverka ligg. Pengane blir brukt til skular, sjukeheimar og andre gode føremål.

Tussa eig og driv 25 vasskraftverk. Les meir om Tussa sin vasskraftproduksjon.

Sola er ei verdifull energikjelde for framtida

Solenergi er den energikjelda i verda som veks fortast. Sjølv om solenergi berre er ein liten del av kraftproduksjonen i Noreg, er det likevel den kraftproduksjonsteknologien som veks raskast.

Betre teknologi, lågare produksjonskostnader og aukande etterspurnad etter fornybar energi har gjort solenergi til ei stadig meir attraktiv energikjelde. Også i Noreg, og på Sunnmøre, er det nok sol til at det er fornuftig å byggje ut solcelleanlegg.

Solcelleanlegget i Tussaparken

Det er berekna at solcelleanlegget på paviljongen vil produsere 105 kWh per kvadratmeter panel i året. Forstørrar vi det opp til 40 m2, og plasserer det på taket på eit bustadhus i Ørsta sentrum, vil det i løpet av eit år kunne produsere 4 200 kWh. Det er nesten 1/4 av straumforbruket til ein gjennomsnittsfamilie.

Vindkraft er ei fornybar og utsleppsfri energikjelde

Noreg har svært gode vindkraftressursar, og vindkraft blir stadig meir konkurransedyktig som energikjelde.

Noreg har i dag eit kraftsystem som er dominert av fleksibel vasskraft. Vatn- og vindkraft samspelar svært godt, ettersom vi kan spare vatn i magasina når det er gode vindforhold, og utnytte vasskrafta når det ikkje bles.

Men vindkraft er omdiskutert i Noreg. Bygging av vindkraftverk krev konsesjon frå styresmaktene, og det er ein omfattande prosess der samfunnsverdien av utbygginga blir vegd opp mot naturinngrep og andre ulemper.

Tussa - med kraft til å skape framtidsretta og miljøvennlege løysingar

Elektrisitet som energiberar er sentral i framtida sitt energisystem. Tussa er ein liten aktør på nasjonalt og internasjonalt nivå, og vi aleine kan ikkje redde verda. Men vi er å rekne med der vi er, og det er på søre Sunnmøre. Vi skal bidra til å løyse utfordringane der vi har vår aktivitet og kan påvirke. Ved å vise fram og informere om fornybar energi, ønskjer vi å inspirere andre til å ta gode miljøval.