Med avtalen på plass held Tussa fram som hovudsponsor for klubben, og partane forsterkar eit samarbeid som har vore viktig for begge over lang tid.

Utviklar klubben vidare

- Det at vi no har forsterka samarbeidet og får med Tussa vidare som hovudsponsor dei neste tre åra, betyr mykje for den vidare utviklinga av klubben. Vi takkar Tussa for gode samtalar, og ser fram til å vidareutvikle samarbeidet dei komande åra, seier marknad og medieansvarleg i Hødd Fotball, André Aurvåg Gardshol.

Avtalen gir Hødd Fotball tryggleik og føreseielege rammer i arbeidet med å utvikle klubben vidare, både sportsleg og organisatorisk. Samstundes stadfestar avtalen Tussa sitt langsiktige engasjement for lokal idrett og samfunnsutvikling på Søre Sunnmøre. Tussa har lange tradisjonar for å bidra til berekraftig utvikling, verdiskaping og samfunnsbygging i regionen. 

Viktig møteplass for mange

– Vi i Tussa er glade for å vidareføre samarbeidet med Hødd Fotball. Hødd tek stort ansvar i lokalsamfunnet, og det engasjementet deler vi. Klubben legg til rette for aktivitet, inkludering og meistring for barn, ungdommar og andre som treng det. Slik blir Hødd ein viktig møteplass for mange, og eit fellesskap vi gjerne støttar, seier Ann Kristin Einbu, kommunikasjonssjef i Tussa.

Hødd Fotball ser fram til å halde fram det gode samarbeidet og skape nye, positive opplevingar saman med Tussa i åra som kjem.