Solid resultat for Tussa

Tussa leverte eit solid resultat i 2025, trass i krevjande marknadsforhold. Konsernet fekk eit driftsresultat på 125,5 mill. kr og resultat etter skatt på 175,5 mill. kr. Både gjennom utbyte og skatt bidreg Tussa med betydelege verdiar som styrkar kommunale tenester, lokalsamfunna og staten.

Resultatet viser at Tussa står støtt trass i eit utfordrande marknadsbilete for kraftproduksjonen. Forretningsområda IKT og installasjon har auka både omsetninga og driftsresultatet i 2025.

Olav Osvoll, konsernsjef i Tussa

Olav Osvoll, konsernsjef i Tussa

Ekstraordinært bidrag frå Linja

Konsernresultatet er særleg påverka av eit svært godt resultat i Linja, som Tussa eig 32,9 prosent av. Linja fekk ei ekstraordinær harmoniinntekt som følgje av fusjonen mellom Mørenett og Linja. Samstundes bidrog høgare produksjonsvolum innan kraftproduksjon og vekst innan IKT og installasjon til å løfte resultatet.

I 2025 gjennomførte Tussa fusjonane med PC Support og Nordvest Elektro Drift. Dette har styrkt både kapasiteten og kundetilbodet i regionen, og gitt betydeleg aktivitetsvekst både i Tussa IKT og Tussa Installasjon.

Lågare kraftprisar, men høg produksjon

Driftsresultatet for kraftproduksjonen vart 92,8 mill. kr, noko lågare enn året før. Kraftproduksjonen var samstundes høg, med 867 GWh, 107 prosent av normalproduksjonen.

- Lågare kraftprisar og lågare prisar på opphavsgarantiar prega året, men god produksjonsplanlegging og høg oppetid i anlegga bidrog til å dempe utslaga, seier Olav Osvoll.

Tussa har også teke viktige steg for framtidig produksjon. I juni fekk konsernet konsesjonsfritak for effektoppgradering av Tussa kraftverk på Bjørke. Det nye kraftverket, Tussa II, er planlagt med ein installert effekt på 150 MW.

Ein viktig samfunnsaktør på Nordvestlandet

Tussa er eit leiande energi- og teknologikonsern på Nordvestlandet, med hovudkontor i Ørsta og verksemd fleire stader i regionen. Konsernet produserer fornybar energi frå 29 vasskraftverk, byggjer og driftar fiberinfrastruktur, leverer IT-tenester og er ein stor aktør innan elektroinstallasjon.

I 2025 bidrog Tussa med betydelege verdiar til eigarane gjennom utbyte og skatt, samstundes som konsernet heldt fram som ein viktig samfunnsaktør og arbeidsgjevar i regionen. Tussa hadde 309 medarbeidarar ved utgangen av året, og av desse var 24 lærlingar i elektrofag og IKT-servicefag.

Nøkkeltal for Tussakonsernet i 2025

Tal for 2024 står i parentes.

Driftsinntekter: 963,3 mill. kr (891,3)
Investeringar: 195,6 mill. kr (178,3)
Driftsresultat: 125,5 mill. kr (150,2)
Resultat før skatt: 226,0 mill. kr (171,4)
Resultat etter skatt: 175,5 mill. kr (108,2)
Skattekostnad: 50,6 mill. kr (63,1)
Ordinært utbyte: 76,2 mill. kr (69,4)

Tussa Kraft

Tussa Kraft

Tussa Kraft er morselskapet i Tussakonsernet, og yter tenester innan økonomi, finans, innkjøp, berekraft, personal, kontoradministrasjon og kommunikasjon til dotterselskapa. Tussa Kraft har hovudkontor i Hovdebygda i Ørsta kommune, og har 23 fast tilsette.

Tussa Energi

Tussa Energi har 28 heileigde vasskraftverk og er deleigar i eitt kraftverk. Kraftverka har ein normalproduksjon på om lag 813 GWh i året. I tillegg til vasskraftproduksjon har Tussa Energi eit biobrenselanlegg. All krafta som vert produsert er fornybar og vert selt på den nordiske kraftbørsen NordPool.

Kart over kraftverka

Tussa Energi har 31 medarbeidarar og kontor i Ørsta og Stranda.

Sunnmøre Energi

Sunnmøre Energi er eit reint produksjonsselskap med to mindre kraftverk som vert opererte av Tussa Energi. Selskapet har ingen tilsette.

Tussa IKT

Tussa IKT er ein totalleverandør av IT-tenester, og leverer løysingar basert på nettskya Azure og eigne datasentre i Ørsta og Sykkylven. I tillegg er selskapet ISO-sertifisert innanfor miljøleiing og IT-sikkerheit, leverer IT-sikkerheitstenester og har ein profesjonell servicedesk.

Tussa IKT sitt fibernett dekkjer søre Sunnmøre, Stryn, Stranda og delar av Sykkylven, og det blir bygt ut fiber til husstandar og bedrifter.

Tussa IKT har 110 medarbeidarar og kontor i Ørsta, Ålesund, Sykkylven, Åndalsnes og Stryn.

Tussa Installasjon

Tussa Installasjon er ein leiande elektroentreprenør på Nordvestlandet. Selskapet har over 75 år med erfaring i bransjen, og tilbyr eit breitt spekter av elektrotekniske tenester til både privat- og bedriftskundar.

Tussa Installasjon har 110 medarbeidarar og avdelingar i Ørsta, Ulsteinvik, Fosnavåg og Stryn.

Linja

Linja er mellom dei største nettselskapa i landet, og er eit samarbeid mellom Tafjord Kraft, Sogn og Fjordane Energi (SFE) og Tussa Kraft. Tafjord Kraft eig 33,8 prosent, SFE eig 33,3 prosent og Tussa Kraft AS eig 32,9 prosent av aksjane i selskapet.

Linja.no