Åmela kraftverk ligg i Dalsfjorden i Volda kommune. Kraftverket vart sett i drift i 1977 og etter snart 50 år er kontrollanlegget modent for ei planlagt utskifting. Medarbeidarar frå kraftproduksjon og installasjon i Tussa er sentrale i arbeidet, i tillegg til ekstern ekspertise frå Eviny Solutions, Rainpower, GE Hydro Nordic, Møre Miljøsanering, Målar Olav og Acrylicon.

- Eit kontrollanlegg består av utstyr for å styre generatoren og turbinen i kraftverket. Det skal syte for effektiv og påliteleg drift, ivareta tryggleiken i kraftverket og beskytte installasjonane ved både normale og unormale driftssituasjonar. Det nye kontrollanlegget vil leggje til rette for framleis påliteleg produksjon av fornybar energi, og bidra til å redusere drifts- og vedlikehaldskostnadene, seier Svein Vassbotn, prosjektleiar i Tussa Energi.

Prøvedrift i juni

Prosjektet starta 30. januar, med ein formell stopp av kraftverket. No er det fire intense månader som ventar dei som skal bidra i arbeidet. 2 500 arbeidstimar skal leggjast ned fram til planlagt prøvedrift 5. juni. Då skal kraftverket i gang igjen for å produsere kraft av smeltevatnet som har fylt magasina i løpet av våren.

Magasinkraftverk

Åmela kraftverk er eit magasinkraftverk som produserer kraft av vatnet i det naturlege nedslagsfeltet til Åmelaelva, i tillegg til overføring av vatn frå ei rekkje mindre nabovassdrag. Magasinkraftverk har magasin for lagring av vatn, slik at vassmengda blir regulert etter behov. Det betyr at krafta kan produserast når kunden treng det, i motsetnad til ikkje-regulerbar elvekraft, vind- og solkraft.

Kraftverket har ein normalproduksjon på 136 GWh, noko som tilsvarar straumforbruket til om lag 7 000 husstandar.

Prediktivt vedlikehald

Kraftverket er fullautomatisert og ubemanna, der all styring og overvaking blir gjort frå driftssentralen. Slik har det vore i mange år, og slik vil det framleis vere. Det nye frå juni er at kraftverket blir designa for prediktivt vedlikehald. Ved hjelp av datainnsamling og analyse av data, vil Tussa kunne forutsjå når det er naudsynt med vedlikehald. Tettare integrasjon mot produksjonsplanlegging gjer at vassressursane blir utnytta på best mogleg måte.

All kraft frå Tussa er fornybar

Tussa eig 25 vasskraftverk og 1 biobrenselanlegg. Tussa sine vasskraftverk har ein samla gjennomsnittleg produksjonskapasitet på 750 GWh i året. Det er nok til å forsyne rundt 37 500 bustadhus med straum i eitt år. For å utnytte vasskrafta på ein driftssikker og god måte, har Tussa eit moderniseringsprogram for dei eldre kraftverka. Ved å byte ut eller renovere gamle delar, og automatisere og digitalisere prosessar, aukar årsproduksjonen på kraftverka og sikrar produksjonen av fornybar energi.