Det var 18 år gamle Noah Lødemel Hansen, lærling i Aurstad, som fekk æra av å sitje bak spakane då arbeidet starta. På markeringa var også Ole Jørgen Mork. Han var 17 år då han starta som hjelpearbeidar under den første Tussa-utbygginga for snart 70 år sidan.

At dei to møttest denne dagen, sette eit historisk perspektiv på markeringa. Medan Mork var med då grunnlaget for dagens kraftproduksjon vart lagt, er Hansen med når neste kapittel i Tussahistoria tek til.

– Dette er ein merkedag for Tussa. Tussa II er den største utbygginga vår nokon sinne. Tussa II vil bidra med meir effekt når behovet for kraft er størst. Når anlegget står ferdig vil det produsere fornybar energi og skape verdiar i mange tiår framover, sa konsernsjef Olav Osvoll under markeringa.