Olav T. Sandnes er stolt av haustprogrammet til TV 2, som i dag blir presentert i si fulle breidde.

– Eg trur sjåarane vil merke taktskiftet TV 2 står midt i. Vi leverer på vårt eige løfte om fornying med eit tosifra antal nye titlar. Når vi i tillegg har etablerte underhaldningsfavorittar, fantastiske sportsrettar og ein nyheitsredaksjon på tå hev fram mot stortingsvalet ligg alt til rette for ein spennande haust, seier Sandnes.

På spørsmål om kva program han vil trekkje fram blir det vanskelegare.

– Det er nesten umogleg for meg å plukke ut enkeltsatsingar, og i det ligg òg styrken til TV 2. Innhaldsporteføljen vår er og skal vere brei og mangslungen. Ambisjonen er ikkje at alle skal like alt, men at alle skal finne noko dei verkeleg elskar i TV 2 sitt programunivers. Som dei fleste andre er eg spent på utfallet av stortingsvalet, og det er ei glede å følge dekninga vi har av dei politiske prosessane og diskusjonane fram til valdagen. Valstudio og partileiardebattane er klassiske favorittar, men vi set òg inn ein ekstra innsats for å hjelpe unge veljarar med å orientere seg med programsatsingane "Emmas stemme" og "Ekte", seier Sandnes.

Kongeleg humor og sterke kjensler på parketten

TV 2-sjefen kan sjå tilbake på ein knallgod vårsesong - no gler han seg til haustjakta startar.

– Vi har ein historisk sterk haust med sportsrettar i kø, og ei nyskapande programsatsing. Vi skal framleis samle familier og vener framanfor skjermen til kjende favorittar, samtidig som vi skal engasjere med nye relevante historier. Sjølv gler eg meg til humorserien "Kjære landsmenn". Med Atle Antonsen og Ine Jansen i hovudrollene trur eg dette blir smart underholdning av beste merke. Og så er det alltid ei glede å sjå kjende profilar møtest til kamp, både på parketten i "Skal vi danse" og i tøffe basketak i "Landskampen", seier Sandnes.

Han er òg spent på korleis TV 2 lukkast med den internasjonale suksessen "LEGO Masters" til norske skjermar.

– Dette formatet veit vi har mange fans. Det finst vel knapt nokon som har vokst opp utan LEGO, og deltakarane i "Lego Masters" tek byggjekunsten til eit nytt nivå. Programmet har samla familien framanfor skjermen i land etter land, og snart skal vi vise det i norsk utgåve til publikum her heime. Håpet er at det vil fengje både store og små!

Han trekk òg fram program som både skal treffe hovudet og hjartet.

– Mange blei kjend med Petter Nyquist i serien "Petter uteligger" for nokre år tilbake. Der møtte vi òg Svein, eit flott menneske som meir enn dei fleste har smakt på utfordringane i livet. I serien "Petter og svein stikker" legg dei saman ut på ei reise som blir både morsom og tankevekkande. Og i min eigen TV 2-favoritt "Vårt lille land" ser vi i haust at vi ikkje må reise langt for å finne dei sterke historiene: Tonje Steinsland opnar sesongen med vår kollega Gerhard Helskog som delar korleis livet hans fekk ei dramatisk vending.

Vil vinne kampen om folk si tid

Sjølv om TV 2-sjefen er særs optimistisk framanfor haustsesongen, er han òg bevisst på at konkurransebiletet blir stadig tøffare.

– Vi konkurrerer som kjent ikkje berre med norske og internasjonale innhalds- og mediehus, men òg med alt anna folk brukar tida si på. I mylderet av tilbod handlar det i bunn og grunn om å gjere oss fortent til folk si tid, og det tek vi på alvor. Vårt løfte er at vi skal skape augneblinkar som har verdi. Der vi engasjerer, gleder, begeistrar og forargar. Håpet for hausten er at sjåarane rett og slett skal velje oss, avsluttar Olav T. Sandnes.